Mae angen llenwi 7,000 o swyddi gwag yn awr!

Mae gwirfoddoli’n gallu bod yn opsiwn gwych, pa oedran bynnag ydych chi. Ystyriwch bobl ifainc. Yn aml iawn allan nhw ddim canfod swydd am nad oes ganddynt y profiad. A does ganddyn nhw ddim profiad am na allan nhw ganfod swydd. Wel, mae gwaith gwirfoddol yn ffordd ragorol o dorri’r cylch cas yma. Byddwch yn dysgu sgiliau newydd, yn profi eich gallu i’r cwmni, yn cael profiad gwerthfawr ac yn gwneud rhywbeth buddiol iawn.

Dysgwch y sgiliau y mae cyflogwyr eu heisiau

Mae gwirfoddoli’n ffordd dda o ddysgu’r sgiliau a chael y profiad y mae cyflogwyr yn chwilio amdanynt. Yn wir, pan ofynnwyd i gyflogwyr, dywedodd 75% ohonynt y byddai’n well ganddynt benodi rhywun sydd â phrofiad o waith gwirfoddol.

Gwirfoddolwch i ddechrau i weld ydych chi’n mwynhau

Nid pobl eraill yn unig sy’n cael budd o’ch gwaith gwirfoddol – rydych yn eich helpu eich hun hefyd. Cewch gyfle i brofi eich gallu i’r cyflogwyr, i gael profiad hanfodol ac i ddysgu sgiliau newydd. Mae hefyd yn rhoi’r cyfle i chi ddysgu mwy am y sector y gweithiwch ynddo, datblygu dealltwriaeth o ofynion y swydd a phenderfynu ydych chi eisiau gyrfa dymor hir yn y maes hwnnw.

Ychydig yn hŷn? Rhannwch eich oes o brofiad

Os ydych wedi cyrraedd cyfnod yn eich bywyd lle’r ydych wedi gweithio ers ugain neu efallai ddeg ar hugain o flynyddoedd, efallai eich bod yn chwilio am sialens newydd; newid cyfeiriad. Mae gwirfoddoli’n ffordd ragorol o gymryd y camau cyntaf yn ôl i addysg. Bydd yn rhoi’r cyfle i chi ddefnyddio eich profiad a dysgu sgiliau newydd. Gallech ganfod gwaith sy’n rhoi boddhad a sialens i chi, sy’n eich gosod ar ben ffordd at yrfa newydd.

Mae mwy na 7,000 o swyddi gwag angen eu llenwi

Oeddech chi’n gwybod bod y sector gwirfoddol yn cyflogi mwy na 46,000 o bobl yng Nghymru? Mae gwirfoddoli’n gallu bod yn opsiwn gwerthfawr a phositif os ydych yn chwilio am swydd ac am gael cyfle i’ch profi eich hun ym myd gwaith.

Mae www.volunteering-wales.net yn wefan wych sy’n hysbysebu swyddi gwirfoddol yng Nghymru ac yn rhoi’r holl ffeithiau angenrheidiol i unrhyw un sydd â diddordeb mewn gwirfoddoli. Ar hyn o bryd mae mwy na 7,000 o swyddi’n aros i gael eu llenwi.

Gwaith gwirfoddol yn helpu Zara i wella

Cafodd Zara Roberts, Dysgwr Oedolion y Flwyddyn, ddamwain beic modur ddifrifol yn 2004 a newidiodd ei bywyd am byth. 'Cefais anaf trawmatig i'r ymennydd, torrais bump asen, anafais fy ysgyfaint, torrais fy nghlun, penelin a ffêr a rhwygais yr aorta gwaelod o'm calon', meddai Zara. 'Roedd yn rhaid i mi ddysgu siarad, cerdded a gwneud popeth o'r dechrau eto fel babi.'

Cyn ei damwain roedd Zara ar ei ffordd i'r brifysgol i hyfforddi I fod yn athrawes yn arbenigo mewn anghenion arbennig. Er bod anawsterau enfawr yn ei wynebu, brwydrodd Zara i ennill ei NVQ lefel 2 mewn Cefnogi Addysg a Dysgu mewn Ysgolion.

Yn ystod ei chwrs pan oedd yn gweithio mewn ysgol gynradd, trefnodd tiwtor Zara ymweliad iddi ag ysgol arbennig. Yn dilyn cyfarfod gyda'r Prifathro, cynigiwyd gwaith gwirfoddol i Zara am dri diwrnod yr wythnos. Roed Zara wrth ei bodd ac mae wedi bod yn gweithio yno ers hynny. Ym mis Medi 2009, aeth Zara yn ôl i'r ysgol yn llawn amser.

 

Gallai wynebau gwahanol olygu gyrfa ddramatig i Becky

Mae merch yn ei harddegau o'r Coed Duon y gallai ei gwaith gael ei ddal i'r oesoedd i ddod ar y sgrin arian wedi sicrhau ei bod yn cael y profiad angenrheidiol i gael ei throed yn y drws.

Mae Rebecca Jenkins sy'n ddeunaw oed, yn hyfforddi am Ddiploma Lefel 3 mewn Coluro Theatrig a'r Cyfryngau yng Ngholeg Gwent yn edrych ymlaen at gwblhau ei hastudiaethau yn 2010.

Nod Becki yw cael ei derbyn wedi hynny ar gyfer prentisiaeth 12 mis gyda'r BBC, yn gweithio gyda rhaglenni teledu a ffilmiau – rhywbeth mae eisoes wedi'i brofi.

Yn ystod lleoliad gwaith yn gynharach y tymor hwn, cafodd gyfle i weithio gyda'r BBC ar dair ffilm fer i'w darlledu ar draws Cymru. “Hoffwn ddilyn y llwybr hwn yn y diwydiant,” dywedodd. “Hyd yn oed gyda'r diwrnodau hir mae'n deimlad gwych i wylio'ch enw yn y glodrestr ar y diwedd.”

Ond efallai na fyddai gyrfa ddelfrydol Becki wedi gweld golau dydd oni bai am gred ei rhieni yn ei gallu.

“Roeddwn wastad wedi bod â diddordeb mewn colur ers pan oeddwn yn fach, ond wnes i erioed freuddwydio am ei astudio yn y coleg,” dywedodd. “Roeddwn wastad o dan yr argraff mai lefelau A neu brentisiaethau oedd yr unig ddewis.”

“Ond cefais fy annog gan fy rhieni i wneud cais am hyn, ac nid wyf wedi edrych yn ôl – rwyf wrth fy modd! Mae'n gwrs mor braf a buaswn yn ei argymell i unrhywun. Efallai y daw fy mreuddwyd o weithio gyda'r BBC yn fyw yr adeg yma'r flwyddyn nesaf oherwydd i mi astudio yn Crosskeys.”